waseem-barelvi

Kya Bataun Kaisa Khud Ko Dar-Ba-Dar Maine Kiya

kya bataun kaisa khud ko dar-ba-dar main ne kiya

umr-bhar kis kis ke hisse ka safar main ne kiya

tu to nafrat bhi na kar paega is shiddat ke saath

jis bala ka pyaar tujh se be-khabar main ne kiya

kaise bachchon ko bataun raston ke pech-o-kham

zindagi-bhar to kitabon ka safar main ne kiya

kis ko fursat thi ki batlata tujhe itni si baat

khud se kya bartav tujh se chhut kar main ne kiya

chand jazbati se rishton ke bachane ko ‘vasim’

kaisa kaisa jabr apne aap par main ne kiya

More Poems

Leave a Comment