Kya Bachaun Tujhe Kya luTaun Tujhe muKHtasar Zindagi

Neelam Malik

kya bacha.un tujhe kya luTa.un tujhe muḳhtasar zindagi

ḳhud pe oḌhun ki niche bichha.un tujhe muḳhtasar zindagi

zarra zarra bikhar kar bhi aḳhir tujhe ḳhatm hona to hai

kyuun na yak-dam hava men uḌa.un tujhe muḳhtasar zindagi

teri kheti pe mera guzara nahin bhuuk miTti nahin

ji men aata hai main bech kha.un tujhe muḳhtasar zindagi

khinchne ka jo va.ada kare saans ko vasl ke pul talak

qissa-e-tul-e-hijran suna.un tujhe muḳhtasar zindagi

tujh se agli taraf maut ki vus.at-e-be-karan maujzan

tu hai divar si chal gira.un tujhe muḳhtasar zindagi

chaar din ki hai mehman mire paas tu mujh se ruTha na kar

naaz tere uTha.un mana.un tujhe muḳhtasar zindagi

ain mumkin hai tu phail jaa.e yunhi vus.at-e-jism men

rog ki tarah dil se laga.un tujhe muḳhtasar zindagi