kuchh to mayus dil tere bas men bhi hai
zindagi ka hunar ḳhar-o-ḳhas men bhi hai
aap ka jo irada ho kah dijiye
dil abhi kuchh meri dastaras men bhi hai
teri marzi se main mangta huun tujhe
mera kirdar meri havas men bhi hai
aa ki TuuTe ta.alluq ko phir joḌ len
tere bas men bhi hai mere bas men bhi hai
shahr-e-gul men bhi hain laakh pabandiyan
aur azadi-e-jan qafas men bhi hai
ho saliqa to phir aadmi ke liye
vus.at-e-zindagi ik nafas men bhi hai
dekhiye dil ka ‘asrar’ kya hashr ho
us ki amadgi pesh-o-pas men bhi hai
Leave a Reply