Tilok Chand Mahroom
kuchh kam nahin nadamat-e-pinhan ḳhata ke ba.ad
be-sud hai har ek saza is saza ke ba.ad
fikr-e-ma.ash ahl-e-mohabbat na kijiye
khane ko ḳhun-e-dil hai fareb-e-vafa ke ba.ad
is daur men karam ka ravadar kaun hai
pachta.e kyuun koi sitam-e-na-rava ke ba.ad
shahon ke saath ye bhi hai taqdir ka mazaq
rizq-e-huma hon saya-e-bal-e-huma ke ba.ad
us ka ilaaj kya hai ba-juz tark-e-mudda.a
jab samna ho yaas ka har mudda.a ke ba.ad
tariḳh us ko bhuul sakegi na ai vatan
aa.ega zikr-e-karb tira karbala ke ba.ad
be-mahri-e-butan se ḳhuda yaad aa gaya
‘mahrum’ kis ko yaad karoge ḳhuda ke ba.ad
Leave a Reply