Anwar Sabri
kuchh abruon pe bal bhi hain ḳhanda-labi ke saath
farma rahe hain jaur magar dil-kashi ke saath
shamil ho gar na gham ki ḳhalish zindagi ke saath
rakkhe na koi rabt-e-mohabbat kisi ke saath
is ehtimam-e-jashn-e-mashiyyat ko kya kahun
paida kiya hai dard dil-e-admi ke saath
jiine na den hayat ki paiham shararten
insan jo ḳhud sharir na ho zindagi ke saath
har gaam par hai laghzish-e-pa ka bhi ik ḳhatar
chaliye rah-e-vafa men salamat-ravi ke saath
mumkin hai mil hi jaa.e maqam-e-sukun kahin
ta marg ham-rikab raho zindagi ke saath
ba-vasf-e-zikr-e-kausar-o-tasnim kis liye
vaa.iz ko zid hai mashghala-e-mai-kashi ke saath
malum us ki talḳhi-e-anjam hai magar
‘anvar’ bila ḳhulus na miliye kisi ke saath
Leave a Reply