Poet
ku-e-janan men ada dekhiye divanon ki
dhajjiyan banTte phirte hain garebanon ki
ḳhaak uḌti hai faza men yunhi parvanon ki
kaun leta hai ḳhabar soḳhta-samanon ki
husn kya shai hai faqat zauq-e-nazar ki taskin
ishq kya chiiz hai taḳhliq hai armanon ki
aap ruḳh sail-e-havadis ka badal deta hai
asman dekh ke gardish mire paimanon ki
aks gulshan pe baharon ka paḌa tha lekin
khinch ga.i phuul pe tasvir bayabanon ki
aaj sahil pe pahunch kar hi rahegi kashti
aaj Takkar hai mire azm se tufanon ki
hashr ke din vo ḳhata-varon pe rahmat hogi
aankh khul ja.egi jannat ke nigahbanon ki
ibn-e-adam ne ‘falak’ hosh sambhala jis dam
sab se pahle rakhi buniyad sanam-ḳhanon ki
Leave a Reply