koi hasin manzar ankhon se jab ojhal ho ja.ega
mujh ko pagal kahne vaala ḳhud hi pagal ho ja.ega
palkon pe us ki jale bujhenge jugnu jab miri yadon ke
kamre men hongi barsaten ghar jangal ho ja.ega
jis din us ki zulfen us ke shanon par khul ja.engi
us din sharm se paani paani ḳhud badal ho ja.ega
jab bhi vo pakiza daman aa ja.ega haath mire
ankhon ka ye mela paani ganga-jal ho ja.ega
us ki yaden us ki baten us ki vafa.en us ka pyaar
kis ko ḳhabar thi jiina mushkil ek ik pal ho ja.ega
mat ghabra ai pyase dariya suraj aane vaala hai
barf pahaḌon se pighli to jal hi jal ho ja.ega
Leave a Reply