Koi Hangama Sar-E-Bazm Uthaya Jae

koi hangama sar-e-bazm uthaya jaae

kuchh kiya jaae charaghon ko bujhaya jaae

bhulna khud ko to asan hai bhula baitha huun

vo sitamgar jo na bhule se bhulaya jaae

jis ke baais hain ye chehre ki lakiren maghmum

ghair-mumkin hai ki manzar vo dikhaya jaae

shaam khamosh hai aur chand nikal aaya hai

kyuun na ik naqsh hi paani pe banaya jaae

zakhm hanste hain to ye fasl-e-bahar aati hai

haan isi baat pe phir zakhm lagaya jaae

Leave a Comment