Ali Sardar Jafri
kitni ashaon ki lashen sukhen dil ke angan men
kitne suraj duub gae hain chehron ke pile-pan men
bachchon ke mithe honton par pyaas ki sukhi ret jami
duudh ki dharen gaae ke than se gir gaiin nagon ke phan men
registanon men jalte hain pade hue sau naqsh-e-qadam par
aaj khiraman koi nahin hai ummidon ke gulshan men
chakna-chur hua khvabon ka dilkash dilchasp aina
tedhi tirchhi tasviren hain tute-phute darpan men
pa-e-junun men padi hui hain hirs-o-hava ki zanjiren
qaid hai ab tak haath sahar ka tariki ke kangan men
ankhon ki kuchh nauras kaliyan nim-shagufta ghuncha-e-lab
kaise kaise phuul bhare hain gulchinon ke daman men
dast-e-ghaib ki tarah chhupa hai zulm ka haath sitam ka vaar
khushk lahu ki barish dekhi ham ne kucha-e-barzan men
Leave a Reply