kitabon ne go isti.aron men ham ko bata.e bahut se Thikane tumhare
magar kuchh vazahat se apna pata do samajhte nahin ham ye mub.ham ishare
har ik phuul gulshan men ye kah raha hai har ik jam-e-mai se ye ham sun rahe hain
zamane ki nazron men ghar hai usi ka jo hans hans ke din zindagi ke guzare
na ahl-e-haram ne madad ki hamari na ahl-e-kalisa ne gham-ḳhvariyan kiin
agar tu bhi tarz-e-taghaful na chhoḌe kahan jaa.en phir ham musibat ke maare
qadamat-pasandon pe kyuun hans rahe ho ḳhuda ki qadamat-pasandi to dekho
hazaron nahin balki lakhon baras se vahi kahkashan hai vahi chand taare
mire ashk-e-ḳhunin ki gul-kariyon se zamane ko rangin qaba.en mili hain
junun-e-mohabbat ka ye faiz samjhun bayaban men bhi hain chaman ke nazare
na gham mujh ko girdab-e-ranj-o-bala ka na muhtaj huun main kisi naḳhuda ka
safine ko maujon ki zad se bacha kar chala ja raha huun kinare kinare
tiri ḳhashmagin aankh ki gardishon ne zamane ko zer-o-zabar kar diya hai
saharon pe koi bharosa kare kya sahare to ḳhud DhunDte hain sahare
usi ru-e-raushan ko ham chahte hain umidon ko tarik jis ne kiya hai
usi mah-e-taban ko ham DhunDte hain dikha.e hain din ko hamen jis ne taare
tire shauq men jo chala ja raha hai jo raste ki mushkil se ghabra raha hai
kabhi apni manzil pe ja hi rahega magar shart ye hai ki himmat na haare
suna hai ki sha.er ho ai ‘josh’ tum bhi nazar bagh-e-jannat pe kyuun hai tumhari
musaddas men haali to ye kah ga.e hain jahannam ko bhar denge sha.er hamare
Leave a Reply