kisi vahshat men phir abad hona chahta huun
main us ki qaid se azad hona chahta huun
purani shakl surat gar malamat ban ga.i hai
na.i miTTi se phir ijad hona chahta huun
kisi ke hijr men hairat-kade abad dekhun
kisi ke vasl men barbad hona chahta huun
use bhi apni banhon men taḌapta dekhna hai
main us ka said tha sayyad hona chahta huun
usi ḳhushbu se phir ham-ḳhvab hone ki havas hai
usi ḳhush-vasl se dil-shad hona chahta huun
ab apni zaat ke zindan men bhi dam ghuT raha hai
koi dam ḳhud se bhi azad hona chahta huun
Leave a Reply