Kisi Dar Pe Jaane Ko Ji Chahta Hai

Jaikrishn Chaudhry Habeeb

kisi dar pe jaane ko ji chahta hai

vafa azmane ko ji chahta hai

uThaya tha jis bazm se ham ko ik din

vahin phir bhi jaane ko ji chahta hai

hue mundamil zaḳhm-e-dil mere lekin

na.e zaḳhm khane ko ji chahta hai

ma.al-e-mohabbat samajhta huun phir bhi

kahin dil lagane ko ji chahta hai

hain kaise maze ke tire jhuTe va.ade

ki phir dhoka khane ko ji chahta hai

vo phir aaj kuchh ham se ruThe hue hain

unhen phir manane ko ji chahta hai

hai muddat se suuni mire dil ki mahfil

tumhin se sajane ko ji chahta hai

jo raushan hain mahfil men aql-o-ḳhirad se

vo sham.en bujhane ko ji chahta hai

jo so.e hue dil men halchal macha de

vo tufan uThane ko ji chahta hai

‘habib’ aag bhar den jo siine men sab ke

vo naghme sunane ko ji chahta hai