ho ke bas insan hairan sar pakad kar baith jaae
kya ban aae us ghadi jab vo bigad kar baith jaae
tu vo aafat hai koi tujh se utha sakta hai dil
dekh le koi jo tujh ko dil pakad kar baith jaae
vasl men bhi us se kah sakta nahin kuchh ḳhauf se
duur khich kar paas se mere na mad kar baith jaae
dosto meri nahin taqsir dil dene men kuchh
dil vo le kar hi uthe jab paas ad kar baith jaae
is ḳhushamad se mira kuchh muddaa hi aur hai
chahte ho tum ye mere paanv pad kar baith jaae
us ka bal kha kar vo uthna paas se mere ghazab
aur ik aafat hai jo vo khich kar akad kar baith jaae
muft le lete hain dil ashiq se apne vo ‘nizam’
laakh phir mange koi thak kar jhagad kar baith jaae