ḳhushbu mire badan men rachi hai ḳhalaon ki
main sair kar raha huun abhi tak fazaon ki
mat rok apne lab pe nazar ki haqiqaten
teri har ik sada hai amanat havaon ki
hai kaun jo karega sadaqat se mol-tol
qimat talab karun bhi to kis se vafaon ki
uTThi hain is tarah se havadis ki andhiyan
miTTi men taab mil ga.i rangin qabaon ki
shahron men aa ke nuur ke sanche men Dhal ga.i
miTTi vahi ki raakh thi galiyon men gaanv ki
‘betab’ aaj DhunDne niklen kidhar amaan
ab shahr shahr ban chuka basti balaon ki
Leave a Reply