Pyar Ke khaTTe-miThe Name Wo Likhti Hai Main paDhta Hun

Basheer Dada

pyaar ke khaTTe-miThe naame vo likhti hai main paḌhta huun

har shab ko jane-anjane vo likhti hai main paḌhta huun

aaj bhi furqat ke lamhon men mere naam ke harf-e-adavat

TeḌhe-meḌhe tirchhe aaḌe vo likhti hai main paḌhta huun

main nazuk ehsas likhun to bojh tale vo dab jaati hai

lafz javaban patthar bandhe vo likhti hai main paḌhta huun

roz baqa-e-baham ki tajviz pe ham ghul-mil jaate hain

baiTh ke aksar maut kinare vo likhti hai main paḌhta huun

meri ThanDi aah pe vo har tarah sama.at rok chuki hai

lekin apne man ki baten vo likhti hai main paḌhta huun

jab us ki tausif likhun to ḳhushbu se ḳhushbu likhta huun

badle men na-zeba ta.ane vo likhti hai main paḌhta huun