KHuda Ki Be-ruKHi Par Ro Rahi Hai

ḳhudā kī be-ruḳhī par ro rahī hai

duā mujh se lipaT kar ro rahī hai

makīñ koī nahīñ hai ghar meñ lekin

kisī kī ruuh andar ro rahī hai

ġhazal māyūs ho kar har jagah se

khaḌī hai mere dar par ro rahī hai

nadī kī pyaas kā ġham kaun samjhe

samundar-dar-samundar ro rahī hai

mohabbat ko koī ghar de ḳhudāyā

bechārī aaj dar-dar ro rahī hai

Leave a Comment