khud mazedar tabiat hai to saman kaisa
zakhm-e-dil aap hain shorish pe namak-dan kaisa
haath vahshat men na ponchhe to gareban kaisa
khar-e-sahra se na uljhe to vo daman kaisa
kucha-e-yar ko daava hai ki jannat main huun
khuld kahte hain kise rauza-e-rizvan kaisa
usi maabud ka hai dair-o-haram men jalva
bahs kis baat ki hai gabr o musalman kaisa
vaada-e-bada-e-athar ka bharosa kab tak
chal ke bhatti pe piyen jura-e-irfan kaisa
ham hue ‘qais’ hue ‘vamiq’ o ‘farhad’ hue
zulf-e-pur-kham ne kiya sab ko pareshan kaisa
duur ke dhol hain yusuf ki kahani sahab
kis ko maalum hai hoga mah-e-kanan kaisa
tere qurban main itna to bata de qatil
meri gardan pe chala khanjar-e-burran kaisa
dil ke aine men tasvir-e-sanam rakhta hai
nahin maalum ki ‘agha’ hai musalman kaisa
Leave a Reply