Pirzada Qasim
ḳhud hi ruThe ho to phir is ka mudava kyon ho
ham na kahte the ki haan ranjish-e-beja kyon ho
har bashar apni pareshan-nazari ke ba-vasf
ḳhud tamasha hai to phir mahv-e-tamasha kyon ho
dil ke bahlane ko ummid-e-karam rakhte hain
varna ye ham bhi samajhte hain ki aisa kyon ho
dasht jo meri tamanna na kare dasht nahin
ḳhaak jis men na uḌe meri vo sahra kyon ho
ek lahza bhi jo pa.un gham-e-hasti se faragh
ik naya ranj pukare hai ki tanha kyon ho
Leave a Reply