Mirza Athar Zia
ḳhud apne qatl ka ilzam Dho raha huun abhi
main apni laash pe sar rakh ke ro raha huun abhi
usi pe fasl khaḌi hogi ik sadaon ki
main jis zamin pe ḳhamoshi bo raha huun abhi
sab apni apni fasilen haTa len raste se
main apni raah ki divar ho raha huun abhi
kaho ki dasht abhi thoḌa intizar kare
main apne paaon nadi men bhigo raha huun abhi
main tujh ko phenk bhi sakta tha zindagi lekin
kisi umiid pe ye bojh Dho raha huun abhi
bahut si ankhen miri raah dekhti hongi
main ek ḳhvab huun ta.abir ho raha huun abhi
Leave a Reply