Anjum Barabankvi
ḳhizan mili abhi tak kahin bahar mile
safar men pyaar ka mausam to ba-vaqar mile
main aise dar ka gada huun jahan pe moti kya
hazar baar mujhe sang ab-dar mile
ḳhushi ka nuur to ik-bargi mila hai tumhen
hamen to gham ke andhere bhi qist-var mile
tiri chamak ka taqaza nahin zarurat hai
tire ḳhamir men thoḌa sa inkisar mile
ye aarzu hai ki ab raushni ke qisse hain
mire charagh ko suraj ka e.atibar mile
main ḳhush-nasib bahut huun ki mujh ko duniya men
qadam qadam pe mohabbat ke shahkar mile
main asmanon zaminon ki had mila dunga
jo char-roz ka sach-much men iḳhtiyar mile
Leave a Reply