khayal-e-yar ka jalva yahan bhi tha vahan bhi tha
zamin par paanv the mere nazar men asman bhi tha
diye raushan the har janib andhera tha magar dil men
bahut tanha tha main lekin sharik-e-karvan bhi tha
chune tinke bahut main ne banaya ashiyan apna
azal se ik musafir huun mujhe is ka guman bhi tha
udhar jaana bhi tha lazim idhar majbur thi sohni
ghada kachcha tha hathon men udhar dariya javan bhi tha
sabhi shamil the yaaro yuun to gulshan ki tabahi men
ab itna saaf kya kahiye ki un men baghban bhi tha
mire har zakhm par ik dastan thi us ke zulmon ki
mire khun-bar dil par us ke hathon ka nishan bhi tha
mukarta tha vo apne tiir se to ik taraf ‘azim’
udhar thame hue ik haath men zalim kaman bhi tha
Leave a Reply