khat ne aa kar ki hai shayad rahm farmane ki arz
tab tu ab sunta hai hans kar mujh se divane ki arz
sham-e-ghurbat ham se majruhon ki hai fariyad-ras
zulf ki chhati phati hai sunte hi shane ki arz
bosa-e-lal-e-butan jo le so ho be-abru
itni hi khidmat men maston ki hai paimane ki arz
gosh-e-gul men sab phaphule pad gae shabnam ke haath
aag thi bulbul ki fariyadon ke afsane ki arz
fasl-e-gul aate hi ‘uzlat’ dil zaban-e-ah se
meri khidmat men kare hai dasht men jaane ki arz
Leave a Reply