Farhat Ehsas
ḳhat bahut us ke paḌhe hain kabhi dekha nahin hai
kya mire parda-nashin ka koi chehra nahin hai
shahr itna bhi na kar zulm ki zid par aa ja.un
mera sahra se ta.alluq abhi TuuTa nahin hai
kya dikhata hai mire naam pe a.ina-e-shahr
muddaton se mira apna koi chehra nahin hai
jism ki pyaas ko huron ki basharat pe na Taal
ye hamara dil-e-sada koi bachcha nahin hai
kuchh nahin tishnagi-e-dida-e-bina ka ilaaj
ḳhvab tak men bhi koi surat-e-dariya nahin hai
kab mujhe tujh se mohabbat hai urus-e-duniya
azdavaji sa ye rishta koi rishta nahin hai
‘farhat-ehsas’ naya chahiye us ko har raat
magar afsos ki us sa koi paida nahin hai
Leave a Reply