Kaukab Zaki
ḳhair ummat hain mohabbat hain vafa pyaar hain ham
amn-e-alam ke zamane men alam-dar hain ham
kyuun hamen log samajhte hain ki ghaddar hain ham
roz-e-avval se vatan tere vafadar hain ham
jang-e-azadi men ham ne bhi kiya ḳhud ko nisar
jaan dene ke liye aaj bhi tayyar hain ham
bughz-o-kine se kudurat se hai nafrat ham ko
ashti-amn-o-mohabbat ke parastar hain ham
koi gham-ḳhvar na monis hai zamane bhar men
ek muddat se musibat men giraftar hain ham
rabb-e-alam hai faqat ek sahara tera
varna duniya men to be-yar-o-madadgar hain ham
koi baḌh kar hamen siine se laga le ai ‘zaki’
tang-nazari se adavat se to bezar hain ham
Leave a Reply