kaash ki jo pahchana hota apnon ko beganon ko
ashkon se phir thoḌe hi bharte apne hi paimanon ko
mere dil ko sab ne samjha ek kira.e ka kamra
jaane kitne zaḳhm diye the main ne bhi mehmanon ko
phuul sa nazuk rishta tha vo ab tum us ko jaane do
kanTon se bhar rakkha tha ham ne apne gul-danon ko
saare ghar ki raunaq tha jo vo bhi ham ko chhoḌ gaya
kyon gaali dete rahte hain kamron ko dalanon ko
ab jab aage hi baḌhna hai miTTi Dalen ḳhatm karen
aḳhir kab tak Dho.enge ham in pyare afsanon ko
kashti jab ho beach safar men ishq samundar sahra kya
manzil ki janib ab dekho chhoḌo bhi tufanon ko
tahziben to ye kahti hain vasl ki ḳhatir zabt karo
zabt se hota kya hi hasil maar diya armanon ko
jannat men bhi dozaḳh ka hi sog manate rahte hain
ḳhushiyan raas nahin atin hain ham jaise insanon ko
qatl na hoga tum se mera main apna hi dushman huun
aag laga do banduqon men phenko tir-kamanon ko
Leave a Reply