Ahmad Ali Barqi Azmi
kar ke asir-e-ghamza-o-naz-o-ada mujhe
ai dil-navaz tu ne ye kya de diya mujhe
jaana tha itni jald to aaya tha kis liye
ek ek pal hai hijr ka sabr-azma mujhe
bujhne lagi hai sham-e-shabistan-e-arzu
ab sujhta nahin hai koi rasta mujhe
ankhen thiin farsh-e-rah tumhare liye sada
tum aas paas ho yahin aisa laga mujhe
ye dard-e-dil hai mere liye ab vabal-e-jan
milta nahin kahin koi dard-ashna mujhe
kashti-e-dil ka saunp diya jis ko nazm-o-nasq
deta raha fareb vahi nakhuda mujhe
rahzan se badh ke us ka ravayya tha mere saath
pahli nigah men jo laga rahnuma mujhe
ab main huun aur khvab-e-pareshan hai mere saath
kitna padega aur abhi jagna mujhe
kya ye junun-e-shauq gunah-e-azim hai
kis jurm ki mili hai ye akhir saza mujhe
‘barqi’ na ho udaas sar-e-rahguzar hai vo
paigham de gai hai ye bad-e-saba mujhe
Leave a Reply