Anjum Khaleeq
kar-e-hunar sanvarne valon men aa.ega
jab bhi hamara naam havalon men aa.ega
Tilon ko saath le ke jo uḌti rahi hava
sahra ka rang barf ke galon men aa.ega
jab aftab-e-umr ki Dhalne lagegi dhuup
tab raushni ka fan mire balon men aa.ega
kaisa firaq kaisi juda.i kahan ka hijr
vo ja.ega agar to ḳhayalon men aa.ega
insan se pyaar husn-parasti vatan se ishq
ham ne kiya hai yuun ki misalon men aa.ega
‘anjum’-ḳhaliq ik na.e anjum ko dekhna
jis din vo agahi ke ujalon men aa.ega
Leave a Reply