kam na tha us gali ke bhulane ka gham
us pe bhari raha yaad aane ka gham
aarzi thi zamane ki ik ik ḳhushi
da.imi tha magar us ke jaane ka gham
ek ummid laghar si be-ruh si
aas ki Dor ke TuuT jaane ka gham
roz bas ek hi gham se bojhal hai dil
shaam Dhalne ka gham raat chhane ka gham
ek arsa hua phir bhi taaza raha
aaj bhi us ke us din na aane ka gham
zer-e-lab koi sahmi hui iltija
zahr tha us pe yuun muskurane ka gham
de ke dil le gaya umr bhar ka sukun
chal diya de ke saare zamane ka gham
ab vo collage kahan aur vo laḌke kahan
hasb-e-ummid paper na aane ka gham
Leave a Reply