Shaista Sahar
kaisi varaftagi se dekhe hai
aadmi aadmi ko dekhe hai
jaag jaa.e hai hasrat-e-didar
jab bhi koi kisi ko dekhe hai
itna saada to vo nahin lagta
jis qadar sadgi se dekhe hai
us ko fursat se dekhti huun main
vo jo kam-fursati se dekhe hai
tere chehre pe kya nazar jaa.e
dil tiri kaj-ravi ko dekhe hai
kyon na jalvon ki dil pe barish ho
tujh se baḌh kar tujhi ko dekhe hai
dekh kar us ko dekhna hai yahi
koi kab tak kisi ko dekhe hai
main mohabbat se us ko takti huun
aur vo dushmani se dekhe hai
kyon na ankhen phir us ki dariya hon
jo musalsal nami ko dekhe hai
chand ki apni raushni hai ‘sahar’
chand kab chandni ko dekhe hai
Leave a Reply