kaif-e-junun sahi yahi halat bani rahe
lillah meri un ki mohabbat bani rahe
jo ho gaya so ho gaya ab us ko chhoḌiye
yuun kijiye ki ishq ki azmat bani rahe
mere gunah hazar sahi sau ki ek baat
ye hai ki dil men aap ki rahmat bani rahe
ai dost tere milne ki surat nahin sahi
kuchh tere kaam aane ki taqat bani rahe
didar ke ḳhayal ki jur.at nahin mujhe
dar ko salam karne ki aadat bani rahe
ai ishq tu ne ḳhuub kiya baagh baagh dil
ta-umr in gulon ki ye nik.hat bani rahe
vo aa ga.e hain ḳhud hi miri zindagi men ab
ankhon men is yaqin ki jalvat bani rahe
har su ayaan bahisht har ik gaam par iram
har lamha vasl hai ye aqidat bani rahe
ya-rab main kar gaya huun kuchh aisi hi ik ḳhata
yuun kijiyo ki dahr men izzat bani rahe
‘rahbar’ ham un se kahte hain ham par jafa karen
un ko dua.en dene ki aadat bani rahe
Leave a Reply