kahta hai kaun hijr mujhe subh o shaam ho
par vasl men bhi lutf nahin jo mudam ho
shikva kiya ho mere lab-e-zakhm ne kabhu
to mujh pe ab-e-tegh ilahi haram ho
sahab tum apne munh ko chhupate ho mujh se kyuun
hai us se kya hijab jo apna ghulam ho
munh lagne se raqib ke ab sar chadhe hain sab
kar daale us ko zabh abhi intizam ho
mat dard-e-dil ko puchh ba-qaul-e-‘fughan’ ‘bayan’
ik umr chahiye mira qissa tamam ho
Leave a Reply