Shahid Jamal
kahin ka ghussa kahin ki ghuTan utarte hain
ghurur ye hai kaghaz pe fan utarte hain
suni hai TuTte patton ki ham ne sargoshi
ye peḌ paude bhi kya pairahan utarte hain
siyasi logon se ummid kaisi ḳhak-e-vatan
vatan ka qarz kahin rahzan utarte hain
zamin pe rakh den agar aap apni shamshiren
to ham bhi apne saron se kafan utarte hain
utar ke ruuh ki gahra.iyon men ham har roz
ḳhud apni qabr men apna badan utarte hain
ḳhuda kare ki salamat rahen ye buḌhe shajar
ki ham parinde yahin par thakan utarte hain
Leave a Reply