kabhi sanjidgi se dekh dil-avez hote hain
vahi lahje jo ḳhanjar se ziyada tez hote hain
mukammal ḳhatm hoti hi nahin nafrat mohabbat se
maraz jaata dava se hai magar parhez hote hain
unhin men kamyabi ke anasir DhunDhta huun main
vo lamhe zindagi men jo shikan-amez hote hain
main dil men chaah kar bhi aur kuchh rakh hi nahin paata
is almari men bas yadon ke dastavez hote hain
hamen to zindagi ke zaviyon se haT ke jiina hai
ki jab mausam nahin hota to ham zarḳhez hote hain
Leave a Reply