kabhi ojhal kabhi pesh-e-nazar hai
mohabbat men shararat ka asar hai
lachak ja.egi shaḳh-e-gul kahan par
nazakat se vo apni be-ḳhabar hai
ada.en dil pe dastak de rahi hain
mohabbat guftugu se bala-tar hai
unhen haq hai vo mujh se ruuTh jaa.en
magar dil men rahen ye un ka ghar hai
ḳhayalon men raha karta hai har dam
bichhaḌ kar bhi vo mera ham-safar hai
agar mumkin ho ḳhushbuon se bhar do
kahani zindagi ki muḳhtasar hai
jhuka.egi use kya ḳhaak duniya
ḳhuda ke samne jhukta jo sar hai
milegi manzil-e-‘maqsud’ ik din
abhi shadab ḳhvahish ka shajar hai
Leave a Reply