firaq-gorakhpuri

Jugnu

ye mast mast ghata, ye bhari bhari barsat

tamam hadd-e-nazar tak ghulavaton ka saman

faza-e-sham men Dore se padte jaate hain

jidhar nigah karen kuchh dhuan sa uthta hai

dahak utha hai taravat ki aanch se akash

ze-farsh ta-falak angdaiyon ka aalam hai

ye mad-bhari hui purvaiyan sanakti hui

jhinjhodti hai hari Daliyon ko sard hava

ye shakh-sar ke jhulon men peng padte hue

ye lakhon pattiyon ka nachna ye raqs-e-nabat

ye be-khudi-e-musarrat ye valihana raqs

ye tal-sam ye chhama-chham ki kaan bajte hain

hava ke dosh pe kuchh uudi uudi shaklon ki

nashe men chuur si parchhaiyan thirakti hui

ufuq pe Dubte din ki jhapakti hain ankhen

khamosh soz-e-darun se sulag rahi hai ye sham!

mire makan ke aage hai ek chauda sahn vasia

kabhi vo hansta nazar aata hai kabhi vo udaas

isi ke biich men hai ek ped pipal ka

suna hai main ne buzurgon se ye ki umr us ki

jo kuchh na hogi to hogi qarib chhiyanve saal

chhidi thi hind men jab pahli jang-e-azadi

jise dabane ke baad us ko ghadr kahne lage

ye ahl-e-hind bhi hote hain kis qadar maasum

vo dar-o-gir vo azadi-e-vatan ki jang

vatan se thi ki ghanim-e-vatan se ghaddari

biphar gae the hamare vatan ke piir o javan

dayar-e-hind men ran pad gaya tha chaar taraf

usi zamane men kahte hain mere daada ne

jab arz-e-hind sinchi khuun se ”saputon” ke

miyan-e-sahn lagaya tha la ke ik pauda

jo ab-o-atish-o-khak-o-hava se palta hua

khud apne qad se ba-josh-e-numu nikalta hua

fusun-e-ruh banati ragon men chalta hua

nigah-e-shauq ke sanchon men roz Dhalta hua

suna hai raviyon se didani thi us ki uthan

har ik ke dekhte hi dekhte chadha parvan

vahi hai aaj ye chhitnar ped pipal ka

vo tahniyon ke kamanDal liye jatadhari

zamana dekhe hue hai ye ped bachpan se

rahi hai is ke liye dakhli kashish mujh men

raha huun dekhta chup-chap der tak us ko

main kho gaya huun kai baar is nazare men

vo us ki gahri jaden thiin ki zindagi ki jaden?

pas-e-sukun-e-shajar koi dil dhadakta tha

main dekhta tha use hasti-e-bashar ki tarah

kabhi udaas kabhi shadman kabhi gambhir

faza ka surmai rang aur ho chala gahra

ghula ghula sa falak hai dhuan dhuan si hai shaam

hai jhutputa ki koi azhdaha hai mail-e-khvab

sukut-e-sham men darmandagi ka aalam hai

ruki ruki si kisi soch men hai mauj-e-saba

ruki ruki si safen malgaji ghataon ki

utaar par hai sar-e-sahn raqs pipal ka

vo kuchh nahin hai ab ik jumbish-e-khafi ke siva

khud apni kaifiyat-e-nil-gun men har lahza

ye shaam Dubti jaati hai chhupti jaati hai

hijab-e-vaqt sire se hai be-his-o-harakat

ruki ruki dil-e-fitrat ki dhadkanen yak-lakht

ye rang-e-sham ki gardish hi asman men nahin

bas ek vaqfa-e-tarik, lamha-e-shahla

sama men jumbish-e-mubham si kuchh hui fauran

tuli ghata ke tale bhige bhige patton se

hari hari kai chingariyan si phuut padin

ki jaise khulti jhapakti hon be-shumar ankhen

ajab ye ankh-micholi thi nur-o-zulmat ki

suhani narm laven dete an-ginat jugnu

ghani siyah khunuk pattiyon ke jhurmut se

misal-e-chadar-e-shab-tab jagmagane lage

ki thartharate hue ansuon se saghar-e-sham

chhalak chhalak pade jaise baghair saan guman

butun-e-sham men in zinda qumqumon ki damak

kisi ki soi hui yaad ko jagati thi

vo be-panah ghata vo bhari bhari barsat

vo scene dekh ke ankhen miri bhar aati thiin

miri hayat ne dekhi hain biis barsaten

mire janam hi ke din mar gai thi maan meri

vo maan ki shakl bhi jis maan ki main na dekh saka

jo aankh bhar ke mujhe dekh bhi saki na vo maan

main vo pisar huun jo samjha nahin ki maan kya hai

mujhe khilaiyon aur daiyon ne paala tha

vo mujh se kahti thiin jab ghir ke aati thi barsat

jab asman men har su ghataen chhati thiin

ba-vaqt-e-sham jab udte the har taraf jugnu

diye dikhate hain ye bhuli-bhatki ruhon ko

maza bhi aata tha mujh ko kuchh un ki baton men

main un ki baton men rah rah ke kho bhi jaata tha

par is ke saath hi dil men kasak si hoti thi

kabhi kabhi ye kasak huuk ban ke uthti thi

yatim dil ko mire ye khayal hota thaa!

ye shaam mujh ko bana deti kaash ik jugnu

to maan ki bhatki hui ruuh ko dikhata raah

kahan kahan vo bichari bhatak rahi hogi

kahan kahan miri khatir bhatak rahi hogi

ye soch kar miri halat ajiib ho jaati

palak ki ot men jugnu chamakne lagte the

kabhi kabhi to miri hichkiyan si bandh jatin

ki maan ke paas kisi tarah main pahunch jaun

aur us ko raah dikhata hua main ghar laun

dikhaun apne khilaune dikhaun apni kitab

kahun ki padh ke suna to miri kitab mujhe

phir is ke baad dikhaun use main vo copy

ki tedhi-medhi lakiren bani thiin kuchh jis men

ye harf the jinhen main ne likkha tha pahle-pahal

aur us ko raah dikhata hua main ghar laun

dikhaun phir use angan men vo gulab ki bel

suna hai jis ko usi ne kabhi lagaya tha

ye jab ki baat hai jab meri umr hi kya thi

nazar se guzri thiin kal chaar panch barsaten

guzar rahe the mah-o-sal aur mausam par

hamare shahar men aati thi ghir ke jab barsat

jab asman men udte the har taraf jugnu

hava ki mauj-e-ravan par diye jalae hue

faza men raat gae jab darakht pipal kaa!

hazaron jugnuon se koh-e-tur banta tha

hazaron vadi-e-aiman thiin jis ki shakhon men

ye dekh kar mire dil men ye huuk uthti thi

ki main bhi hota inhin jugnuon men ik jugnu

to maan ki bhatki hui ruuh ko dikhata raah

vo maan main jis ki mohabbat ke phuul chun na saka

vo maan main jis se mohabbat ke bol sun na saka

vo maan ki bhench ke jis ko kabhi main so na saka

main jis ke anchalon men munh chhupa ke ro na saka

vo maan ki ghutnon se jis ke kabhi lipat na saka

vo maan ki siine se jis ke kabhi chimat na saka

humak ke god men jis ki kabhi main chadh na saka

main zer-e-saya-e-ummid jis ke badh na saka

vo maan main jis se shararat ki daad pa na saka

main jis ke hathon mohabbat ki maar kha na saka

sanvara jis ne na mere jhanDule balon ko

basa saki na jo honton se suune galon ko

jo meri aankhon men ankhen kabhi na Daal saki

na apne hathon se mujh ko kabhi uchhal saki

vo maan jo koi kahani mujhe suna na saki

mujhe sulane ko jo loriyan bhi ga na saki

vo maan jo duudh bhi apna mujhe pila na saki

vo maan jo haath se apne mujhe khila na saki

vo maan gale se mujhe jo kabhi laga na saki

vo maan jo dekhte hi mujh ko muskura na saki

kabhi jo mujh se mithai chhupa ke rakh na saki

kabhi jo mujh se dahi bhi bacha ke rakh na saki

main jis ke haath men kuchh dekh kar Dahak na saka

patak patak ke kabhi paanv main thunak na saka

kabhi na khincha shararat se jis ka anchal bhi

racha saki miri aankhon men jo na kajal bhi

vo maan jo mere liye titliyan pakad na saki

jo bhagte hue baazu mire jakad na saki

badhaya pyaar kabhi kar ke pyaar men na kami

jo munh bana ke kisi din na mujh se ruuth saki

jo ye bhi kah na saki ja na bolungi tujh se

jo ek baar khafa bhi na ho saki mujh se

vo jis ko jutha laga munh kabhi dikha na saka

kasafaton pe miri jis ko pyaar aa na saka

jo mitti khane pe mujh ko kabhi na piit saki

na haath thaam ke mujh ko kabhi ghasit saki

vo maan jo guftugu ki rau men sun ke meri bad

kabhi jo pyaar se mujh ko na kah saki ghamad

shararaton se miri jo kabhi ulajh na saki

himaqaton ka miri falsafa samajh na saki

vo maan kabhi jise chaunkane ko main luk na saka

main raah chhenkne ko jis ke aage ruk na saka

jo apne haath se bahrup mere bhar na saki

jo apni aankhon ko aina mera kar na saki

gale men Daali na bahon ki phul-mala bhi

na dil men lauh-e-jabin se kiya ujala bhi

vo maan kabhi jo mujhe baddhiyan pahna na saki

kabhi mujhe nae kapdon se jo saja na saki

vo maan na jis se ladakpan ke jhuut bol saka

na jis ke dil ke daran kunjiyon se khol saka

vo maan main paise bhi jis ke kabhi chura na saka

saza se bachne ko jhuti qasam bhi kha na saka

vo maan ki ayat-e-rahmat hai jis ki chin-e-jabin

vo maan ki haan se bhi hoti hai badh ke jis ki nahin

dam-e-itab jo banti farishta rahmat ka

jo raag chhedti jhunjhla ke bhi mohabbat ka

vo maan ki ghudkiyan bhi jis ke giit ban jaaen

vo maan ki jhidkiyan bhi jis ki phuul barsaen

vo maan ham us se jo dam bhar ko dushmani kar len

to ye na kah sake ab aao dosti kar len

kabhi jo sun na saki meri totli baten

jo de saki na kabhi thappadon ki saughaten

vo maan bahut se khilaune jo mujh ko de na saki

khiraj-e-sar-khushi-e-sarmadi jo le na saki

vo maan main jis se ladai kabhi na thaan saka

vo maan main jis pe kabhi mutthiyan na taan saka

vo meri maan main kabhi jis ki piith par na chadha

vo meri maan kabhi kuchh jis ke kaan men na rakha

vo maan kabhi jo mujhe kardhani pinha na saki

jo taal haath se de kar mujhe nacha na saki

jo mere haath se ik din dava bhi pi na saki

ki mujh ko zindagi dene men jaan hi de di

vo maan na dekh saka zindagi men jis ki chaah

usi ki bhatakti hui ruuh ko dikhata raah

ye soch soch ke ankhen miri bhar aati thiin

to ja ke suune bichhaune pe let rahta tha

kisi se ghar men na raaz apne dil ke kahta tha

yatim thi miri duniya, yatim meri hayat

yatim sham-o-sahar thii, yatim the shab-o-roz

yatim meri padhai thi mere khel yatim

yatim meri masarrat thi mera gham bhi yatim

yatim ansuon se takiya bhiig jaata tha

kisi se ghar men na kahta tha apne dil ka bhed

har ik se duur akela udaas rahta tha

kisi shamail-e-nadida ko main takta tha

main ek vahshat-e-be-nam se hadakta tha

guzar rahe the mah-o-sal aur mausam par

isi tarah kai barsaten aaiin aur gaiin

main rafta rafta pahunchne laga ba-sinn-e-shuur

to jugnuon ki haqiqat samajh men aane lagi

ab un khilaiyon aur daiyon ki baton par

mira yaqin na raha mujh pe ho gaya zahir

ki bhatki ruhon ko jugnu nahin dikhate charagh

vo man-ghadat si kahani thi ik fasana tha

vo be-padhi likhi kuchh auraton ki thi bakvas

bhatakti ruhon ko jugnu nahin dikhate charagh

ye khul gaya mire bahlane ko thiin ye baten

mira yaqin na raha in fuzul qisson par

hamare shahar men aati hain ab bhi barsaten

hamare shahar par ab bhi ghataen chhati hain

hanuz bhigi hui surmai fazaon men

khutut-e-nur banati hain jugnuon ki safen

faza-e-tira men udti hui ye qindilen

magar main jaan chuka huun ise bada ho kar

kisi ki ruuh ko jugnu nahin dikhate raah

kaha gaya tha jo bachpan men mujh se jhuut tha sab

magar kabhi kabhi hasrat se dil men kahta huun

ye jante hue jugnu nahin dikhate charagh

kisi ki bhatakti hui ruuh ko magar phir bhi

vo jhuut hi sahi kitna hasin jhuut tha vo

jo mujh se chhin liya umr ke taqaze ne

main kya bataun vo kitni hasin duniya thi

jo badhti umr ke hathon ne chhin li mujh se

samajh sake koi ai kaash ahd-e-tifli ko

jahan dekhna mitti ke ek reze ko

numud-e-lala-e-khud-rau men dekhna jannat

kare nazara-e-kaunain ik gharaunde men

utha ke rakh le khudai ko jo hatheli par

kare davam ko jo qaid ek lamhe men

suna? vo qadir-e-mutlaq hai ek nannhi si jaan

khuda bhi sajde men jhuk jaae samne us ke

ye aql-o-fahm badi chiiz hain mujhe taslim

magar laga nahin sakte ham is ka andaza

ki aadmi ko ye padti hain kis qadar mahngi

ik ek kar ke vo tifli ke har khayal ki maut

bulugh-e-sin men vo sadme nae khayalon ke

nae khayal ka dhachka nae khayal ki tiis

nae tasavvuron ka karb, al-aman ki hayat

tamam zakhm nihan hai tamam nashtar hai

ye chot kha ke sambhalna muhal hota hai

sukut raat ka jis vaqt chhedta hai sitar

kabhi kabhi tiri paael ki aati hai jhankar

to meri aankhon se moti barasne lagte hain

andheri raat ke parchhaven Dasne lagte hain

main jugnu ban ke to tujh tak pahunch nahin sakta

jo tujh se ho sake ai maan tu vo tariqa bata

tu jis ko pa le vo kaghaz uchhal duun kaise

ye nazm main tire qadmon men Daal duun kaise

nava-e-dard se kuchh ji to ho gaya halka

magar jab aati hai barsat kya karun is ko

jab asman men udte hain har taraf jugnu

sharab-e-nur liye sabz abginon men

kanval jalate hue zulmaton ke sinon men

jab un ki tabish-e-be-sakhta se pipal ka

darakht sarv-e-charaghan ko maat karta hai

na jaane kis liye ankhen miri bhar aati hain

More Poems

Leave a Comment