Ameen Rahat Chugtai
jo mai-kade se bhi daman bacha bacha ke chale
tiri gali se jo guzre to laḌkhaḌa ke chale
hamen bhi qissa-e-dar-o-rasan se nisbat hai
faqih-e-shahr se kah do nazar mila ke chale
koi to jaane ki guzri hai dil pe kya jab bhi
ḳhizan ke baagh men jhonke ḳhunuk hava ke chale
ab e’tiraf-e-jafa aur kis tarah hoga
ki teri bazm men qisse miri vafa ke chale
hazar honT mile hon to kya fasana-e-dil
sunane vaale nigahon se bhi suna ke chale
kahin suragh-e-chaman mil hi ja.ega ‘rahat’
chalo udhar ko jidhar qafile saba ke chale
Leave a Reply