Jo Hain Mazlum Un Ko To Tadapta Chhod dete Hain

Abbas Dana

jo hain mazlum un ko to tadapta chhod dete hain

ye kaisa shahr hai zalim ko zinda chhod dete hain

ana ke sikke hote hain faqiron ki bhi jholi men

jahan zillat mile us dar pe jaana chhod dete hain

hua kaisa asar maasum zehnon par ki bachchon ko

agar paise dikhao to khilauna chhod dete hain

agar maalum ho jaae padosi apna bhuka hai

to ghairat-mand hathon se nivala chhod dete hain

mohazzab log bhi samjhe nahin qanun jangal ka

shikari sher bhi kavvon ka hissa chhod dete hain

parindon ko bhi insan ki tarah hai fikr rozi ki

sahar hote hi apna ashiyana chhod dete hain

taajjub kuchh nahin ‘dana’ jo bazar-e-siyasat men

qalam bik jaaen to sach baat likhna chhod dete hain