jazbon men pahle jaisi sadaqat nahin rahi
ab darmiyan hamare mohabbat nahin rahi
bhuli hui huun kab se main ḳhud ko bata.un kya
ab tujh ko yaad karne ki aadat nahin rahi
kaisa saman hai kaisi ye fasl-e-bahar hai
shahr-e-vafa ke phulon men nik.hat nahin rahi
vo bujh ga.i sitara-ada aankh kab ki dost
dil men kisi ke pyaar ki hasrat nahin rahi
teri vafa ne aisa sabaq de diya mujhe
mujh ko kisi bhi zaat se nafrat nahin rahi
ai ‘hadia’ shu.ur-e-mohabbat jise diya
ab vo hi kah raha hai ki ulfat nahin rahi
Leave a Reply