jaate ho tum jo ruuth ke jaate hain ji se ham
tum kya khafa ho khud hain khafa zindagi se ham
kuchh aise bad-havas hain dil ki lagi se ham
kahte hain muddaa-e-dil muddai se ham
be-zar ho chuke hain bahut dil-lagi se ham
bas ho to umr bhar na milen ab kisi se ham
ye jante to shikve na karte raqib ke
kahte hain teri zid se milenge usi se ham
mujrim hai kaun donon men insaf kijiye
chhup chhup ke aap milte hain ya muddai se ham
ham aur chaah ghair ki allah se Daro
milte hain tum se bhi to tumhari khushi se ham