Farooq Bakshi
jali hain dard ki sham.en magar andhera hai
kahan ho kuchh to kaho dil bahut akela hai
ye kaisa zahr fazaon men bhar gaya yaaro
har ek aadmi kyuun is qadar akela hai
mire nasib men kab hai ye raushni ka nagar
mare liye to yahan har taraf andhera hai
jala.e rakhna diye pyaar ke main a.unga
mujhe tumhari vafa par baḌa bharosa hai
chamak uThe miri palkon pe yaad ke jugnu
ye kis ne pyaar se phir aaj mujh ko dekha hai
kahan kahan main use DhunDhta raha ‘faruq’
jo meri ruuh ki gahra.iyon men rahta hai
Leave a Reply