jal-pari hai to vo tasḳhir bhi ho sakti hai
ḳhvab hota hai to ta.abir bhi ho sakti hai
zindagi ko zara shatranj samajh kar dekho
mere jhuk jaane men tadbir bhi ho sakti hai
mas.ale mujh ko miTane hi ka saman nahin
mas.alon se miri ta.amir bhi ho sakti hai
yaar ma.alum hava hai ki ḳhala ḳhali nahin
raat a.ine men tasvir bhi ho sakti hai
zindagi film nahin jis ka ho anjam hasin
surat-e-hal ye gambhir bhi ho sakti hai
is se behtar hai ki ham samne laa.en ulfat
kuchh nahin hone ki tash.hir bhi ho sakti hai
zimmedari bhi dafatir men taraqqi se baḌhe
aap ki tie to zanjir bhi ho sakti hai
saare jaale hain vajuhat ke jaale lekin
ye jo makḌi hai ye taqdir bhi ho sakti hai
vaqt ke saath nikhar jaata hai taḳhliq ka fan
sham-e-‘zishan’ shab-e-‘mir’ bhi ho sakti hai
Leave a Reply