jahan na dil ko sukun hai na hai qarar mujhe
ye kis maqam pe le aai yad-e-yar mujhe
ye baat sach hai main barg-e-ḳhizan-rasida huun
magar salam kiya karti hai bahar mujhe
sitam ye hai vo kabhi bhuul kar nahin aaya
tamam umr raha jis ka intizar mujhe
bas apne-ap sanvarna bhi koi baat hui
tu apni zulf ki surat kabhi sanvar mujhe
abas hai dosto tashrih-e-vada-e-farda
ab is ka zikr bhi hota hai nagavar mujhe
tamam umr jhulasta raha main sahra men
kahin shajar nazar aaya na saya-dar mujhe
bahar-e-nau ye haqiqat hai ya fareb-e-nigah
libas-e-gul nazar aata hai taar taar mujhe
gunah jis se na sarzad hua ho ai ‘ajiz’
usi ko haq hai vo kah de gunahgar mujhe
Leave a Reply