jab suna us ne ki pyasa mar gaya
sharm se basti ka chashma mar gaya
tere aate ji uTha tha ek shaḳhs
tere jaate hi dobara mar gaya
is tarah roke hue tha saans main
dekhne valon ne samjha mar gaya
dost jis ko DhunDte phirte hain ab
mere andar ka vo laḌka mar gaya
is liye pahchanta koi nahin
kam jiya huun aur ziyada mar gaya
jis ki ḳhushbu thi hamare shahar men
gaanv ka vo phuul vaala mar gaya
tere hisse ka abhi zinda huun main
apne hisse ka to puura mar gaya
ab tujhe pinjre men rakha ja.ega
tere hathon ik parinda mar gaya
vaqt hai ik rail-gaḌi ki tarah
jis ne roka us ka rasta mar gaya
Leave a Reply