jab kabhi baat kisi ki bhi buri lagti hai
aisa lagta hai ki siine men chhuri lagti hai
raat bhari thi to the us ke sitam se be-zar
subh aai hai to vo aur buri lagti hai
vo ho araish-e-afkar ki zebaish-e-fan
aaj donon ki ravish khana-puri lagti hai
log mange ke ujale se hain aise marub
raushni apne charaghon ki buri lagti hai
ahl-e-danish hue arbab-e-siyasat ke murid
aisi pasti pe mire dil men chhuri lagti hai
Leave a Reply