Jazib Quraishi
jab bhi aata hai vo mere dhyan men
phuul rakh jaata hai roshan-dan men
ghar ke bam-o-dar na.e lagne lage
husn aisa tha mire mehman men
tera chehra aa.ine ke samne
aur a.ina na.e imkan men
aks tere teri ḳhushbu tere rang
bas yahi kuchh hai mire saman men
jism-o-jan ko taaza mausam mil ga.e
jal gaya main tere atish-dan men
jo sitara parvarish paata raha
vo mila hai pyaar ke ruj.han men
titliyan kamre ke andar aa ga.iin
ek phuul aisa bhi tha gul-dan men
andhiyon men bhi uḌata hai mujhe
kaun hai ye mere jism-o-jan men
dhaḌkanen teri hain be-avaz kyuun
kya nahin huun main tire imkan men
jab daraḳht angna.iyon ke kaT ga.e
dhuup utar aa.i hai har dalan men
ajnabi ḳhvabon ka surat-gar huun main
aur main gum huun tiri pahchan men
Leave a Reply