Anwar Shadani
jante hi nahin ḳhushi kya hai
gham ke maron ki zindagi kya hai
faisla kar diya zamane ne
dosti kya hai dushmani kya hai
ma-siva ik hasin ghaflat ke
baagh men phuul ki hansi kya hai
ek ke gham ko dusra samjhe
aur mansha-e-dosti kya hai
jante hain tumhare divane
azmat-e-chak-damani kya hai
zulf-o-ruḳhsar saghar-o-mina
jaane ye sher-o-sha.eri kya hai
inkisar-o-ḳhulus-o-hamdardi
aur me.araj-e-zindagi kya hai
chaudhvin shab ke chand men ‘anvar’
aks un ka hai chandni kya hai
Leave a Reply