janan ga.e dinon ka ta.alluq bahal kar
a.ina ban gaya huun miri dekh-bhal kar
apni hi rahguzar ke bujhata hai kyuun charagh
har raste se mera guzarna muhal kar
ik roz aisa ho ki charaghon ke ru-ba-ru
kuchh men hunar karun koi tu bhi kamal kar
tahvil-e-intizar men kab tak rahegi aankh
mere supurd meri nazar ka ma.aal kar
Dar hai kahin main dasht ki janib nikal na ja.un
baiTha huun apne paanv men zanjir Daal kar
‘mohsin’ bure dinon men naya dost kaun ho
hai jis ka pahla qarz usi se saval kar
Leave a Reply