Arshad Jamal Sarim
iztirab aisa hua dil ka sahara mujh ko
koi Thahrav nahin ḳhud men gavara mujh ko
sar uThati hai vo tajdid ki ḳhvahish mujh men
naqsh-gar sochne lagta hai dobara mujh ko
main tahi-dast khaḌa tha sar-e-sahra-e-hayat
aarzu ne tiri yak-laḳht pukara mujh ko
ja pahunchna kisi rif.at ko nahin hai dushvar
haan! Thaharne ka vahan chahiye yaara mujh ko
dekh ai meri zabun-hali pe hansne vaale
vaqt ki dhuup ne kis darja nikhara mujh ko
ek kankar sa mozahim men rahunga kab tak
le hi ja.ega baha kar koi dhara mujh ko
vaqt ne jaane banana hai mujhe kya ‘sarim’
gardish-e-chak se ab tak na utara mujh ko
Leave a Reply