Itni Qurbat Bhi Nahin Thik Hai Ab Yar Ke Sath

itnī qurbat bhī nahīñ Thiik hai ab yaar ke saath

zaḳhm khā jāoge kheloge jo talvār ke saath

ek aahaT bhī mire ghar se ubhartī hai agar

log kaan apne lagā lete haiñ dīvār ke saath

paañv sākit haiñ magar ghuum rahī hai duniyā

zindagī Thahrī huī lagtī hai raftār ke saath

ek jaltā huā aañsū mirī āñkhoñ se girā

beḌiyāñ TuuT ga.iiñ zulm kī jhankār ke saath

kal bhī anmol thā maiñ aaj bhī anmol huuñ maiñ

ghaTtī baḌhtī nahīñ qīmat mirī bāzār ke saath

kaj-kulāhī pe na maġhrūr huā kar itnā

sar utar aate haiñ shāhoñ ke bhī dastār ke saath

kaun sā jurm ḳhudā jaane huā hai sābit

mashvare kartā hai munsif jo gunahgār ke saath

shahr bhar ko maiñ mayassar huuñ sivā.e us ke

jis kī dīvār lagī hai mirī dīvār ke saath

Leave a Comment