itni qurbat bhi nahin Thiik hai ab yaar ke saath
zaḳhm kha jaoge kheloge jo talvar ke saath
ek aahaT bhi mire ghar se ubharti hai agar
log kaan apne laga lete hain divar ke saath
paanv sakit hain magar ghuum rahi hai duniya
zindagi Thahri hui lagti hai raftar ke saath
ek jalta hua aansu miri ankhon se gira
beḌiyan TuuT ga.iin zulm ki jhankar ke saath
kal bhi anmol tha main aaj bhi anmol huun main
ghaTti baḌhti nahin qimat miri bazar ke saath
kaj-kulahi pe na maghrur hua kar itna
sar utar aate hain shahon ke bhi dastar ke saath
kaun sa jurm ḳhuda jaane hua hai sabit
mashvare karta hai munsif jo gunahgar ke saath
shahr bhar ko main mayassar huun siva.e us ke
jis ki divar lagi hai miri divar ke saath
Leave a Reply