Ishq Se Pahle Wo Insan Tha Achchha-KHasa

ishq se pahle vo insān thā achchhā-ḳhāsā

us kā jīvan bhī gulistān thā achchhā-ḳhāsā

ham buzurgoñ se hamesha yahī sunte aa.e

is jagah phūloñ kā bustān thā achchhā-ḳhāsā

kab talak haath ko phailātā maiñ us ke aage

us kā pahle se hī ehsān thā achchhā-ḳhāsā

kisī aurat ne nahīñ bhejī hai us ko la.anat

jo mire jism meñ haivān thā achchhā-ḳhāsā

do do dariyā merī āñkhoñ meñ ravāñ rahne lage

aur maiñ pyaas se halkān thā achchhā-ḳhāsā

aa.ina kahtā hai kyā ho gayā ‘anvar’ hai udaas

pahle bhītar tire shaitān thā achchhā-ḳhāsā

Leave a Comment